தற்போதைய அரசின் சில அமைச்சர்கள் ஆன்மீக தலைவர்களை அவமதிக்கும் வகையில் கருத்து தெரிவிப்பதை கண்டிக்கிறேன் என்று கொழும்பு பேராயர் கார்டினல் மால்கம் ரஞ்சித் தெரிவித்தார்.
நாட்டின் ஆன்மீக சிந்தனை பெருமளவில் கி.மு. 3ஆம் நூற்றாண்டில் அரஹத் மகிந்தர் கொண்டு வந்த புத்தமதமும் அதன் மதிப்புகளும் வழியாக வடிவமைக்கப்பட்டுள்ளது. மக்களின் பழக்கவழக்கங்கள் மற்றும் ஒழுக்கநெறிகளும் அதனால் பாதிப்படைந்தவை என அவர் குறிப்பிட்டார்.
தமக்கு விருப்பமான மதத்தையும் வாழ்க்கை தத்துவத்தையும் பின்பற்ற அனைவருக்கும் சுதந்திரம் உள்ளதெனினும், நீண்டகால மத பாரம்பரியம் கொண்ட, குறிப்பாக புத்தமதத்தின் தாக்கத்தால் உருவான நாட்டாகிய இலங்கையில், நாட்டின் தலைவர்கள் அந்த மத பாரம்பரியத்துக்கு மரியாதை செலுத்த வேண்டும் என அவர் வலியுறுத்தினார்.
சில அரசியல் கொள்கைகளில் சிக்கிக் கொண்டு, சமூகத்தின் மத அடிப்படைகளுக்கும் நெறிமுறைகளுக்கும் எதிரான பாதையில் நாட்டை கொண்டு செல்ல முயல்வது எதிர்பார்க்கப்படும் பொருளாதார மற்றும் சமூக முன்னேற்றத்துக்கு வழியல்ல என்றும் அவர் கூறினார்.
சமீப காலமாக ஆட்சியாளர்கள் புத்த பிக்குகள் மற்றும் பிற மதத் தலைவர்களை பொதுச் சமூக பிரச்சினைகளில் கருத்து சொல்லவோ செயல்படவோ உரிமையற்றவர்களாக பார்க்கும் நிலை அதிகரித்துள்ளதாகவும் அவர் சுட்டிக்காட்டினார். சில அமைச்சர்களே ஆன்மீக தலைமைத்துவத்தை அவமதிக்கும் வகையில் கருத்து தெரிவிப்பது கண்டிக்கத்தக்கது என அவர் கூறினார்.
ஒரு நாட்டின் உண்மையான பொருளாதார முன்னேற்றம் நீதிநெறி அடிப்படையில் மட்டுமே அமையும் என்றும், இலங்கை அரசியலமைப்பும் நாட்டின் மத பாரம்பரியத்துக்கு முன்னுரிமை அளிப்பதை உறுதிப்படுத்துகிறது என்றும் அவர் தெரிவித்தார்.
பொருளாதார முன்னேற்றம் இருந்தாலும், நெறிமுறைகள், நீதி உணர்வு, வளங்களை அனைவருடனும் பகிர்ந்துகொள்ளும் மனப்பான்மை இல்லையெனில், அந்த சமூகம் விரைவில் வீழ்ச்சியடையும் என அவர் எச்சரித்தார். இதற்கான எடுத்துக்காட்டாக ஐரோப்பாவில் உருவாகியுள்ள மதமற்ற, ஒழுக்கமற்ற சமூக சூழலை அவர் சுட்டிக்காட்டினார்.
இலங்கை தற்போது கடுமையான பொருளாதார காலகட்டத்தில் இருப்பதாகவும், அரசியல் தலைவர்கள் வழங்கும் வாக்குறுதிகள் இருந்தாலும், நாட்டின் பொருளாதார அடித்தளம் இன்னும் பலவீனமாகவே உள்ளதாகவும் அவர் குறிப்பிட்டார். ஆகவே, நாட்டின் தலைவர்கள் நாட்டின் கலாச்சாரத்துக்கும் நாகரிகத்துக்கும் பொருந்தாத சிந்தனைகளின் அடிப்படையில் நாட்டை முன்னேற்ற முயலக்கூடாது என்றும், மத சிந்தனையை அவமதிக்காமல், அதை நாட்டின் முன்னேற்றத்தின் அளவுகோலாகக் கொண்டு செயல்பட்டால் சிறந்த நாட்டை உருவாக்க முடியும் என்றும் அவர் தெரிவித்தார்.
இந்த கருத்துகளை கார்டினல் மால்கம் ரஞ்சித், 78வது தேசிய சுதந்திர தினத்தை முன்னிட்டு நேற்று (04) பொரெல்லா அனைத்து புனிதர்களின் தேவாலயத்தில் நடைபெற்ற சிறப்பு திருப்பலியின் போது தெரிவித்தார்.