இலங்கையின் முன்னாள் ஜனாதிபதியும் ஐக்கிய தேசியக் கட்சியின் தலைவருமான ரணில் விக்கிரமசிங்க, ஐக்கிய தேசியக் கட்சிக்கும் ஐக்கிய மக்கள் சக்திக்கும் இடையிலான கூட்டணி மாத்திரம் தேர்தல் வெற்றியை உறுதிப்படுத்தாது எனத் தெரிவித்துள்ளார்.
அடுத்த தேர்தலில் வெற்றிபெறுவதற்கு சுமார் 80 இலட்சம் ஜென் ஸீ மற்றும் மில்லேனியல் தலைமுறையைச் சேர்ந்த இளம் வாக்காளர்களின் ஆதரவைப் பெறுவது அவசியம் என்றும் அவர் வலியுறுத்தியுள்ளார்.
இளம் வாக்காளர்களில் கணிசமானோர் இதுவரை எந்த அரசியல் கட்சிக்கு ஆதரவளிப்பது என்பது குறித்து தீர்மானிக்கவில்லை எனக் குறிப்பிட்ட ரணில் விக்கிரமசிங்க, அவர்களின் நம்பிக்கையை வெல்வதே எதிர்காலத் தேர்தல் வெற்றிக்கு முக்கியமானதாக அமையும் எனத் தெரிவித்துள்ளார்.
ஐக்கிய தேசியக் கட்சியும் ஐக்கிய மக்கள் சக்தியும் ஒன்றிணைந்தால் தேர்தலில் வெற்றிபெற முடியும் எனச் சிலர் நம்புவதாகக் குறிப்பிட்ட அவர், அது மாத்திரம் வெற்றியை உறுதிப்படுத்தாது என்றும் தெரிவித்துள்ளார்.
இலங்கையின் அரசியல் சூழல் குறிப்பிடத்தக்க மாற்றங்களைச் சந்தித்துள்ளதாகவும், பாரம்பரிய அரசியல் உத்திகளைக் கொண்டு மாத்திரம் இனிவரும் தேர்தல்களில் வெற்றிபெற முடியாது என்றும் அவர் சுட்டிக்காட்டியுள்ளார்.
65 ஆண்டுகால வரலாற்றைக் கொண்ட ஐக்கிய தேசியக் கட்சி, இளம் தலைமுறையினரைக் கவரும் வகையில் புதிய அரசியல் அடையாளத்தை உருவாக்க வேண்டும் என்றும் அவர் வலியுறுத்தியுள்ளார்.
2022ஆம் ஆண்டு இலங்கையில் ஏற்பட்ட பொருளாதார நெருக்கடியைத் தொடர்ந்து, பாரம்பரிய அரசியல் மீதான நம்பிக்கையை இளம் தலைமுறையினர் பலர் இழந்துள்ளதாகவும் அவர் குறிப்பிட்டுள்ளார்.
இலங்கை, பங்களாதேஷ், நேபாளம் மற்றும் செர்பியா உள்ளிட்ட நாடுகளில் இளைஞர்களால் முன்னெடுக்கப்பட்ட அரசியல் இயக்கங்களைச் சுட்டிக்காட்டிய ரணில் விக்கிரமசிங்க, உலகளாவிய அரசியல் மாற்றங்களில் இளம் தலைமுறையினர் அதிக செல்வாக்குச் செலுத்தி வருவதாகத் தெரிவித்துள்ளார்.
இந்நிலையில், இளம் ஆதரவாளர்களை ஈர்க்கும் நோக்கில் ‘மில்லேனியம் யு.என்.பி.’ மற்றும் ‘ஜென் ஸீ யு.என்.பி.’ ஆகிய குழுக்களுடன் கட்சி ஏற்கனவே பணியாற்றி வருவதாகவும் அவர் தெரிவித்துள்ளார்.
பாரம்பரியமாகக் கட்சிக் கிளைகளை அமைப்பதற்குப் பதிலாக, ஆரம்பத்தில் டிஜிட்டல் தளங்கள் ஊடாக மக்களுடன் தொடர்புகளை ஏற்படுத்தும் புதிய அரசியல் அமைப்பு முறைகளை இந்தக் குழுக்கள் ஆராய்ந்து வருவதாகவும் அவர் குறிப்பிட்டுள்ளார்.
எனவே, பாரம்பரிய வாக்காளர் தளத்தையும் அரசியல் கூட்டணிகளையும் மாத்திரம் நம்பியிருப்பது போதுமானதல்ல எனச் சுட்டிக்காட்டிய ரணில் விக்கிரமசிங்க, இளம் வாக்காளர்களின் ஆதரவைப் பெறத் தவறினால் அரசியல் கட்சிகள் முன்னோக்கிச் செல்வதில் சிரமங்களை எதிர்கொள்ள நேரிடும் என்றும் எச்சரித்துள்ளார்.