இலங்கை சுங்கத் திணைக்களத்தின் பொறுப்பில் எடுக்கப்பட்ட 437 வாகனங்கள் எட்டு ஆண்டுகளுக்கும் மேலாக முறையான நிர்வாகம் மற்றும் பராமரிப்பின்றி பல்வேறு வளாகங்களில் நிறுத்தி வைக்கப்பட்டுள்ளதால், அவை கடுமையாக சேதமடைந்து, அவற்றின் குறைந்தபட்ச ஏல மதிப்பைக்கூட இழக்கும் நிலைக்கு தள்ளப்பட்டுள்ளதாக கணக்காய்வு அறிக்கையொன்றில் தெரியவந்துள்ளது.
இவ்வாறு நீண்டகாலமாக நிறுத்தி வைக்கப்பட்டுள்ள வாகனங்களில் பெரும்பாலானவை தற்போது முழுமையாக இயக்க முடியாத நிலையில் இருப்பதாக சுங்கத் திணைக்களத்தின் 2025ஆம் ஆண்டுக்கான வருடாந்த செயல்திறன் அறிக்கையில் இடம்பெற்றுள்ள கணக்காய்வு அவதானிப்புகளில் சுட்டிக்காட்டப்பட்டுள்ளது.
கணக்காய்வு அறிக்கையின்படி, குறித்த 437 வாகனங்களும் இரண்டு முக்கிய இடங்களில் நிறுத்தி வைக்கப்பட்டுள்ளன. அதன்படி, மட்டக்குளிய வளாகத்தில் 329 வாகனங்களும், ஹம்பாந்தோட்டை ருஹுணுபுர வளாகத்தில் 108 வாகனங்களும் நிறுத்தி வைக்கப்பட்டுள்ளன.
மட்டக்குளிய வளாகம் என்பது சுங்கத் திணைக்களத்தினால் தனியார் நிறுவனமொன்றிடமிருந்து பெற்றுக்கொள்ளப்பட்ட காணியாகும். ஏனைய 108 வாகனங்கள் ஹம்பாந்தோட்டை ருஹுணுபுர சர்வதேச துறைமுக வளாகத்தில் நிறுத்தி வைக்கப்பட்டுள்ளன.
பல ஆண்டுகளாக இந்த வாகனங்கள் வெயில் மற்றும் மழைக்கு வெளிப்புறத்தில் தொடர்ந்து வெளிப்பட்ட நிலையில் இருந்ததால், உலோகப் பாகங்கள் துருப்பிடித்தல், உட்புற உபகரணங்கள் சேதமடைதல் உள்ளிட்ட கடுமையான உடல் ரீதியான சேதங்கள் ஏற்பட்டுள்ளதாகவும் கணக்காய்வு அறிக்கையில் குறிப்பிடப்பட்டுள்ளது.
சுங்கக் கட்டளைச் சட்டத்தின் 109ஆவது பிரிவின்படி, பொறுப்பில் எடுக்கப்பட்ட அல்லது அரசுடைமையாக்கப்பட்ட பொருட்கள் தொடர்பில் குறிப்பிட்ட காலத்திற்குள் உரிய சட்ட மற்றும் நிர்வாக நடவடிக்கைகளை மேற்கொள்வது கட்டாயமாகும்.
எனினும், உரிய சட்ட ஏற்பாடுகள் உரிய காலத்தில் நடைமுறைப்படுத்தப்படாததன் காரணமாக இந்த வாகனங்கள் தொடர்பில் தீர்மானங்களை மேற்கொள்வதில் தாமதம் ஏற்பட்டுள்ளதாக தேசிய கணக்காய்வு அலுவலகம் அவதானித்துள்ளது.
இதன் விளைவாக, அரசாங்கத்திற்கு நியாயமான ஏல வருமானத்தை ஈட்டிக்கொள்ளக் கிடைத்திருந்த வாய்ப்பு தற்போது இழக்கப்பட்டு வருவதாகவும் தேசிய கணக்காய்வு அலுவலகம் சுட்டிக்காட்டியுள்ளது.
எனவே, அரச வருமானத்தைப் பாதுகாப்பதற்கும், அரசுடைமையாக்கப்பட்ட பொருட்களின் நிர்வாகத்தை முறையாக முன்னெடுப்பதற்கும், எதிர்காலத்தில் இவ்வாறான இழப்புகளைத் தடுக்கும் வகையில் சட்ட ரீதியான தீர்வுகளை விரைவுபடுத்துதல் மற்றும் வெளிப்படைத்தன்மையுடன் கூடிய துரித ஏல நடைமுறையை அறிமுகப்படுத்துதல் அவசியம் எனவும் அந்த அறிக்கையில் வலியுறுத்தப்பட்டுள்ளது.