இலங்கை அரசியல் வரலாற்றில் இதுவரை நடைமுறைப்படுத்தப்படாத வலுவான அரச நிர்வாகத்தை உருவாக்குவதாகக் கூறியே அனுர குமார திஸாநாயக்க தலைமையிலான அரசாங்கம் ஆட்சிக்கு வந்ததாக எதிர்க்கட்சித் தலைவர் சஜித் பிரேமதாச தெரிவித்துள்ளார்.
தற்போதைய நிறைவேற்று ஜனாதிபதி முறைமையின் அதிகாரங்களை மாற்றியமைத்து, புதிய அரசியலமைப்பை உருவாக்கி, அடிப்படை உரிமைகளை மறுசீரமைப்பதுடன் அவற்றை மேலும் வலுப்படுத்தி, மக்களின் பொருளாதார, சமூக மற்றும் அரசியல் உரிமைகளை உறுதிப்படுத்தி பாதுகாப்பான நாட்டை உருவாக்குவதாக அரசாங்கம் வாக்குறுதியளித்ததாகவும் அவர் குறிப்பிட்டுள்ளார்.
எனினும், மக்களின் ஆதரவுடன் ஆட்சிக்கு வந்த அரசாங்கத்தினால் இதுவரை வழங்கிய வாக்குறுதிகளில் ஒன்றைக்கூட நிறைவேற்ற முடியாத நிலை ஏற்பட்டுள்ளதாகவும் அவர் குற்றஞ்சாட்டியுள்ளார்.
எதிர்க்கட்சித் தலைவர் சஜித் பிரேமதாச இன்று (29) விசேட அறிக்கையொன்றை வெளியிட்டு இதனைத் தெரிவித்துள்ளார்.
எரிபொருள் விலை, மின்சாரக் கட்டணம் குறைப்பு உள்ளிட்ட வாக்குறுதிகள் நிறைவேற்றப்படவில்லை
எரிபொருள் விலை மற்றும் மின்சாரக் கட்டணங்களைக் குறைப்பதுடன், வறுமையை ஒழிப்பதாக வழங்கிய வாக்குறுதிகளையும் அரசாங்கத்தினால் நிறைவேற்ற முடியவில்லை என எதிர்க்கட்சித் தலைவர் தெரிவித்துள்ளார்.
நாட்டின் நுண், சிறிய மற்றும் நடுத்தர அளவிலான தொழில்முனைவோர், விவசாயிகள், மீனவர்கள் மற்றும் தொழிலாளர்களை வலுப்படுத்துவது உள்ளிட்ட பல்வேறு விடயங்களிலும் மக்களுக்கு வாக்குறுதிகளை வழங்கிய அரசாங்கம், அவற்றை நிறைவேற்றத் தவறியுள்ளதாகவும் அவர் சுட்டிக்காட்டியுள்ளார்.
இவ்வாறான தோல்விகளால் அரசாங்கத்தின் மீதான மக்களின் ஆதரவு குறைந்து வரும் நிலையில், அதனைத் தக்கவைத்துக்கொள்வதற்காக அரசாங்கத்திற்கு எதிரான பயங்கரவாதத் தடுப்புச் சட்டத்தின் மூலம் அச்சுறுத்தல், மிரட்டல் மற்றும் அரச ஒடுக்குமுறையை விரிவுபடுத்துவதற்கு அரசாங்கம் முயற்சிப்பதாகவும் அவர் குற்றஞ்சாட்டியுள்ளார்.
அரசாங்கத்திற்கு எதிரான பயங்கரவாதத் தடுப்புச் சட்டம் நடைமுறைப்படுத்தப்பட்டால் மக்களின் சிவில், மனித மற்றும் அரசியல் உரிமைகள் பாதிக்கப்படும் அபாயம் உள்ளதாகவும், பயங்கரவாதி என ஒருவரை வரையறுக்கும் அதிகாரம் அரசாங்கத்திடம் சென்றடையும் என்றும் அவர் தெரிவித்துள்ளார்.
ஒடுக்குமுறையை அடிப்படையாகக் கொண்ட பழிவாங்கும் நடவடிக்கைகளுக்கு அரசாங்கம் முயற்சி
புதிய சட்ட ஏற்பாடுகள் மூலம் துன்புறுத்தல், அழுத்தம் மற்றும் அரசியல் பழிவாங்கல்களை மையமாகக் கொண்ட நடவடிக்கைகளை முன்னெடுத்து, ஜனநாயகத்தை முற்றாக ஒழித்து, சர்வாதிகார மற்றும் ஒரு கட்சி ஆட்சியை நோக்கி அரசாங்கம் நகர்வதாக எதிர்க்கட்சித் தலைவர் தெரிவித்துள்ளார்.
அரசாங்கத்தின் இயலாமை மற்றும் தோல்விகளே இத்தகைய நடவடிக்கைகளுக்குக் காரணம் எனவும், மக்களை நேரடியாகச் சந்திக்க முடியாத நிலையில் உள்ள அரசாங்கப் பிரதிநிதிகள், கடுமையான சட்டங்கள் மூலம் தமது அதிகாரங்களைப் பாதுகாத்துக்கொள்ள முயற்சிப்பதாகவும் அவர் குறிப்பிட்டுள்ளார்.
அரசாங்கம் வழங்கிய வாக்குறுதிகள் நிறைவேற்றப்படாததால் மக்களிடையே உருவாகும் அதிருப்தியைத் தடுக்கவும், அச்சுறுத்தல் மற்றும் அடக்குமுறை மூலம் அதிகாரத்தைத் தக்கவைத்துக்கொள்ளவும் அரசாங்கத்திற்கு எதிரான பயங்கரவாதத் தடுப்புச் சட்டம் கொண்டுவரப்படுவதாகவும் அவர் குற்றஞ்சாட்டியுள்ளார்.
தேசிய பாதுகாப்பின் பெயரில் நிறைவேற்று அதிகாரங்களை வலுப்படுத்த முயற்சி
தேசிய பாதுகாப்பை உறுதிப்படுத்துவதற்கான சட்டங்களை உருவாக்கும்போது சர்வதேச சட்டங்கள், விதிகள் மற்றும் ஒழுங்குமுறைகளுக்கு இணங்கச் செயற்படுவது அவசியம் என எதிர்க்கட்சித் தலைவர் தெரிவித்துள்ளார்.
ஆனால், அரசாங்கம் முன்வைக்கும் சட்ட ஏற்பாடுகள் நிறைவேற்று அதிகாரத்தை மேலும் வலுப்படுத்தி, ஜனநாயகத்தைச் சீர்குலைத்து, ஒரு கட்சி ஆட்சியை நோக்கி நாட்டைக் கொண்டுசெல்லும் வகையில் அமைந்துள்ளதாகவும் அவர் தெரிவித்துள்ளார்.
அரசாங்கத்தின் அடக்குமுறைச் சட்டங்களால் GSP+ சலுகை இழக்கப்படலாம்
இவ்வாறான கடுமையான சட்டங்கள் நாட்டிற்குப் பாரிய பாதிப்புகளை ஏற்படுத்தக்கூடும் எனவும் எதிர்க்கட்சித் தலைவர் எச்சரித்துள்ளார்.
பயங்கரவாதத் தடுப்புச் சட்டத்தை நீக்குமாறு ஐரோப்பிய ஒன்றியம் கோரியிருந்ததாகவும், மனித உரிமைகள் மற்றும் ஜனநாயக உரிமைகளைப் பாதுகாப்பதை உறுதிப்படுத்தும் நிபந்தனைகளின் அடிப்படையில் இலங்கைக்கு GSP+ வர்த்தகச் சலுகை வழங்கப்பட்டதாகவும் அவர் தெரிவித்துள்ளார்.
இந்நிலையில், தற்போதைய சட்டத்தைவிடவும் கடுமையான ஒடுக்குமுறைச் சட்டங்களை ஐரோப்பிய ஒன்றியம் எதிர்பார்க்கவில்லை எனக் குறிப்பிட்ட அவர், அரசாங்கத்தின் புதிய சட்ட ஏற்பாடுகளால் இலங்கையின் ஏற்றுமதிகளுக்குக் கிடைக்கும் GSP+ வர்த்தகச் சலுகை இழக்கப்படும் அபாயம் உள்ளதாகவும் எச்சரித்துள்ளார்.
மக்களை வலுப்படுத்துவதற்கே அரசாங்கத்திற்கு ஆணை வழங்கப்பட்டது
அரசாங்கத்தின் இயலாமையால் மக்களை மேலும் நெருக்கடிக்குள் தள்ளாமல், ஜனநாயகத்தைப் பாதிக்கும் சட்டங்களை அறிமுகப்படுத்துவதைத் தவிர்க்க வேண்டும் என எதிர்க்கட்சித் தலைவர் வலியுறுத்தியுள்ளார்.
அதற்குப் பதிலாக, புதிய அடிப்படை உரிமைகள் அத்தியாயமொன்றை உருவாக்கி, மக்களின் அடிப்படை உரிமைகளை மேலும் பாதுகாப்பதற்கான நடவடிக்கைகளை அரசாங்கம் முன்னெடுக்க வேண்டும் எனவும் அவர் தெரிவித்துள்ளார்.
சட்டங்களின் மூலம் மக்களின் உரிமைகளை மீறாமல், அவர்களின் உரிமைகளையும் ஜனநாயகத்தையும் பாதுகாக்க அரசாங்கம் நடவடிக்கை எடுக்க வேண்டும் எனவும் அவர் வலியுறுத்தியுள்ளார்.
அரசாங்கத்திற்கு மக்கள் வழங்கிய ஆணை, பெலவத்தையில் அமைந்துள்ள கட்சித் தலைமையகத்தை வலுப்படுத்துவதற்காக அல்ல என்றும், மக்களின் இறைமை மற்றும் சுயாட்சியைப் பாதுகாப்பதற்காகவே அந்த ஆணை வழங்கப்பட்டதாகவும் எதிர்க்கட்சித் தலைவர் சஜித் பிரேமதாச மேலும் தெரிவித்துள்ளார்.