நாடாளுமன்றத்தில் சமர்ப்பிக்கப்பட்டுள்ள ஒழுங்கமைக்கப்பட்ட குற்றங்களைத் தடுக்கும் சட்டமூலத்தில் (POCA) குறிப்பிடப்பட்டுள்ள சந்தேகநபர்களைத் தடுத்து வைக்கும் காலத்தை 72 மணித்தியாலங்களிலிருந்து 48 மணித்தியாலங்களாகக் குறைக்கத் தயாராக இருப்பதாக ஜனாதிபதி அநுரகுமார திசாநாயக்க தெரிவித்துள்ளார்.
அத்துடன், தற்போது உயர் நீதிமன்றத்தில் சவாலுக்கு உட்படுத்தப்பட்டுள்ள குறித்த சட்டமூலத்தின் மேலும் இரண்டு சர்ச்சைக்குரிய சரத்துகளையும் திருத்துவதற்கு அரசாங்கம் தயாராக இருப்பதாக அவர் குறிப்பிட்டுள்ளார்.
பயங்கரவாதத் தடுப்புச் சட்டம் நீண்டகாலமாக ஒழுங்கமைக்கப்பட்ட குற்றவாளிகளுக்கு எதிராகப் பயன்படுத்தப்பட்டு வந்ததாகக் குறிப்பிட்ட ஜனாதிபதி, தாம் நீண்டகாலமாக அந்தச் சட்டத்திற்கு எதிராகச் செயற்பட்டவர்கள் என்றும், அதன் பாதிப்புகளை அனுபவித்தவர்கள் என்றும் தெரிவித்தார்.
எனவே, அவ்வாறான சட்டம் அவசியமில்லை என்பதை ஏற்றுக்கொள்வதாகவும், அதனை நீக்கி அதற்குப் பதிலாக மேலும் வலுவற்ற புதிய சட்டமொன்றைக் கொண்டுவருவதாகவும் அவர் கூறினார்.
ஒழுங்கமைக்கப்பட்ட குற்றங்களை ஒழிப்பதற்கு நாட்டில் சட்டமொன்று அவசியம் எனத் தெரிவித்த ஜனாதிபதி, புதிய சட்டமூலத்திற்கு எதிராக இரண்டு தரப்பினர் கருத்து வெளியிட்டு வருவதாகக் குறிப்பிட்டார்.
அவர்களில் ஒரு தரப்பினர் ஒழுங்கமைக்கப்பட்ட குற்றவாளிகளின் சலுகைகளையும் பாதுகாப்பையும் பேண விரும்புபவர்கள் எனவும், மற்றைய தரப்பினர் மனித உரிமைகள் தொடர்பில் அக்கறை கொண்டவர்கள் எனவும் அவர் தெரிவித்தார்.
மனித உரிமைகள் தொடர்பில் அக்கறை கொண்ட தரப்பினருடன் கலந்துரையாடுவதற்குத் தமது அரசாங்கம் தயாராக இருப்பதாகவும் ஜனாதிபதி கூறினார்.
இந்நிலையில், சட்டமூலத்தில் திருத்தம் செய்யப்படவுள்ள முக்கிய விடயங்கள் வருமாறு:
1. தடுப்புக் காவல் காலம்: சந்தேகநபர்களை 72 மணித்தியாலங்கள் தடுத்து வைக்கும் ஏற்பாட்டை 48 மணித்தியாலங்களாகக் குறைக்கத் தீர்மானிக்கப்பட்டுள்ளது.
2. பச்சை குத்திய அடையாளங்கள்: ஒழுங்கமைக்கப்பட்ட குற்றக் குழுக்களை அடையாளம் காண பச்சை குத்திய அடையாளங்களைப் பயன்படுத்துவது தொடர்பான ஏற்பாட்டை இலங்கைக்கு அவசியமில்லை எனக் கருதினால் நீக்குவதற்குத் தயாராக இருப்பதாக ஜனாதிபதி தெரிவித்தார்.
3. கலால் கட்டளைச் சட்டத்தின் கீழான குற்றங்கள்: கலால் கட்டளைச் சட்டத்தின் கீழ் இடம்பெறும் குற்றங்களையும் ஒழுங்கமைக்கப்பட்ட குற்றத் தடுப்புச் சட்டத்தின் கீழ் கொண்டுவரும் ஏற்பாட்டை நீக்குவதற்கும் அரசாங்கம் தயாராக இருப்பதாக அவர் குறிப்பிட்டார்.
தற்போது இந்தச் சட்டமூலம் தொடர்பான விவகாரம் உயர் நீதிமன்றத்தில் பரிசீலிக்கப்பட்டு வருவதாகவும், மேலும் ஏதேனும் திருத்தங்கள் முன்வைக்கப்பட்டால் அவற்றையும் பரிசீலிக்க அரசாங்கம் தயாராக இருப்பதாகவும் ஜனாதிபதி தெரிவித்தார்.
ஜனாதிபதி அநுரகுமார திசாநாயக்க இந்தக் கருத்துகளை நேற்று (05) அலரிமாளிகையில் நடைபெற்ற ‘நாடு முழுவதும் ஒன்றிணைந்து’ தேசிய செயற்பாட்டின் சர்வமத மாநாட்டில் உரையாற்றும்போது தெரிவித்தார்.