அனுராதபுர ருவான்வெலிசாய் முன்றலில் இடம்பெற்று வரும் சத்யாகிரகப் போராட்டத்தின் போது கடந்த 07ஆம் திகதியன்று கைது செய்யப்பட்ட நபரின் இரத்தத்தில் ஹெரோயின் மற்றும் கஞ்சா போன்ற நச்சுப் போதைப்பொருட்கள் கலந்திருந்தமை பரிசோதனைகள் மூலம் உறுதிப்படுத்தப்பட்டுள்ளதாகப் பொலிஸார் தெரிவித்துள்ளனர்.
ருவான்வெலிசாய் மற்றும் ஜெய ஸ்ரீ மகா போதி உள்ளிட்ட புனித பூமிப் பிரதேசங்களிலிருந்து விலகுமாறு நீதிமன்றம் உத்தரவிட்டிருந்த போதிலும், அதனை மீறி பிக்குகள் மற்றும் பொதுமக்களுடன் இணைந்து ஆரம்பிக்கப்பட்ட இந்தச் சத்யாகிரகப் போராட்டம் இன்று (09) மூன்றாவது நாளாகவும் தொடர்ச்சியாக முன்னெடுக்கப்பட்டு வருகிறது.
இப்போராட்டத்தில் தீவிரமாகச் செயற்பட்டு வந்த ‘சங்கு ஊதுபவர்’ என அழைக்கப்படும் நபர், பொலிஸ் கடமைகளுக்கு இடையூறு விளைவித்த குற்றச்சாட்டின் பேரில் கடந்த 07ஆம் திகதியன்று அனுராதபுர பொலிஸாரால் கைது செய்யப்பட்டார். பின்னர் அவர் நீதிமன்றத்தில் ஆஜர்படுத்தப்பட்டதை அடுத்து, வரும் 19ஆம் திகதி வரை அவரை விளக்கமறியலில் வைக்குமாறு உத்தரவிடப்பட்டுள்ளது.
கைது செய்யப்பட்ட நபரிடம் மேற்கொள்ளப்பட்ட மேலதிக மருத்துவப் பரிசோதனைகளின் போது, அவர் கைது செய்யப்படும் தருணத்தில் ஹெரோயின் மற்றும் கஞ்சா ஆகிய இருவகைப் போதைப்பொருட்களையும் பயன்படுத்தியிருந்தது உறுதிப்படுத்தப்பட்டுள்ளதாகப் பொலிஸார் மேலும் குறிப்பிட்டுள்ளனர்.
புனித பூமிப் பகுதியில் இடம்பெறும் இத்தகைய போராட்டத்தின் பின்னணியில் போதைப்பொருள் பாவித்த நபர்கள் சம்பந்தப்பட்டிருப்பது பொதுமக்களிடையே பெரும் அதிர்ச்சியையும் விவாதத்தையும் ஏற்படுத்தியுள்ளது.